Bora Húsareynstunnilin ígjøgnum um nakrar vikur

- 117 metrar eru eftir at bora av Húsareynstunlinum, sum gongur frá ovara parti av Villingadalsvegnum og út í Marknagil.

Tað sigur Tróndur Sigurðsson, formaður í byggi- og býarskipanarnevndini hjá Tórshavnar kommunu.

- Ætlanin var at hava skotið seinasta skotið beint eftir páskir, men tað fer at taka eitt sindur longur tíð, so helst verður borað ígjøgnum einar tvær ella tríggjar vikur eftir páskir.

Húsareynstunnlin er størsta verkætlan í undirstøðukervinum hjá Tórshavnar kommunu, og fevnir hon um 9,2 kilometrar av vegi og ein 1705 metra langan tunnil.

Samstundis sum tunnilin verður gjørdur, verður vegurin frá Sandvíkahjalla og suður ígjøgnum Hoyvíkshagan til tunnilsmunnan á Villingadalsvegnum gjørdur, og til tað arbeiðið verður brúkt grót úr tunlinum.