Kontrast FM: Nú skulu føroyameistararnir finnast

Føroyameistararnir í judo, borðtennis og badminton skulu finnast, tá Kontrast FM verður í høllini á Hálsi í Havn leygardagin.

Kringvarpið vísir einstaklingafinalurnar beinleiðis í sjónvarpinum og tær eru 10 í tali.

Í judo verður kappast um FM hjá mans- og kvinnuunglingum, hjá monnum undir 66 kilo, hjá monnum undir 81 kilo og í opna bólkinum hjá kvinnum og monnum.

Í borðtennis og badminton skulu føroyameistararnir hjá kvinnum og monnum finnast. 

kontrast_skra.jpeg

Innleiðandi kappingarnar ikki lidnar

Tað er bert í badminton, at finalistarnir eru funnir.  Hjá kvinnum spælir tvífaldi føroyameistarin, Miriam í Grótinum, ímóti Sannu Thorkildshøj, sum er í finaluni fyri fyrstu ferð.

Hjá monnum bresta Fai Yin Wong og Rúni Øster saman. Teir hava heldur ikki verið i finaluni fyrr.

Innleiðandi umførini í borðtennis og judo vera fríggjakvøldið, og tá verður greitt, hvør skal kappast í finalunum leygardagin.