Frystilínuskipið "Mars" komið til Føroya

Tað var seinnapartin í gjár, at frystilínuskipið "Mars" kom á Havnina, har skipið skal gera ymiskt arbeiði áðrenn tað skal í vinnu.

Fiskur.fo skrivar, at eitt nú skal tjúkkari lína umborð, nýggjur krani setast á dekkið, og frystaríiið skal dagførast. 

Arbeiðið fer væntandi at  taka umleið tríggjar til fýra vikur.

Frystilínuskipið Mars

Bygt í 1988

Nýggja skipið skal fiska undir Føroyum, í altjóða sjógvi og um tað verður møguligt, so vóna reiðaríið eisini at sleppa á Flemish Kap við skipinum.

Mars er bygt í 1988 á Karstensens skipasmiðjuni í Skagen og hevur havt nøvnini Loran, Gandi, Stapin, Tromsø, Polar Ummannaq og Ummannaq.

Skipið skal millum annað avloysa Havbúgvan, sum er elsta línuskipið í føroyska flotanum, og bygt í Noregi í 1959, og sostatt er 65 ára gamalt.