Útflutningurin av lýsi og fiskamjøli er vaksin 828 milliónir krónur

828 milliónir krónur er útflutningurin av lýsi og fiskamjøli vaksin, vísa nýggjastu tølini frá Hagstovuni.

Fiskavøruútflutningurin er vaksin 280 milliónir krónur, ella tvey prosent.

Hesin vøkstur stavar serliga frá útflutninginum av lýsi og fiskamjøli, sum vaks ávikavist 402 og 426 milliónir krónur.

Samlaði útflutningurin minkaður

Samlaði útflutningurin frá mars í fjør til februar í ár er tó 47 milliónir krónur minni enn undanfarna 12 mánaða skeið. 

Útflutta nøgdin av laksi minkaði 4.082 tons ella fimm prosent, men virðið er áleið tað sama sum í undanfarna tíðarskeiði.

Onnur fiskasløg eru minkað bæði í virði og nøgd, og størsta broytingin í útflutningsvirðinum á toski og makreli, sum minkaði ávikavíst 140 og 192 milliónir krónur.

Hinvegin er vøkstur í bæði virði og nøgd í útflutninginum av sild.

Útflutningsvirðið er vaksið 92 milliónir krónur og nøgdin góð 18 túsund tons, svarandi til 31 prosent.