Steypakappingin í fótbólti: Finalistarnir bresta saman í fjórðingsfinaluni

Í fjør vann NSÍ á KÍ í finaluni í steypakappingini við kvinnum. Soleiðis verður ikki í ár, tí tey bæði liðini skulu spæla ímóti hvørjum øðrum longu í fjórðingsfinaluni hesa ferð.

Tað er greitt eftir lutakastið í gjár.

Víkingur og AB skulu spæla í 1. umfari um pláss í fjórðingsfinalunum. Annars háttaði lutakastið seg soleiðis:

1. umfar (mikudagin 8. mai)
AB – Víkingur 
 

Fjóðingsfinalurnar (mikudagin 12. juni)
HB – Skála
AB ella Víkingur – FC Hoyvík
NSÍ – KÍ
B36 – TB/FCS/Royn

Hálvfinalurnar í steypakappingini hjá kvinnum verða spældar ávikavist 27. august og 25. september, meðan finalan verður á Tórsvølli leygardagin 5. oktober.

KÍ vendi øllum síðstu løtuna

Landskappingardysturin ímillum kvinnurnar hjá NSÍ og KÍ var karmur um lutakastið í gjár.

Sara Samson Lamhauge legði NSÍ framum fyri steðgin, og leingi sá út til, at runavíkingar fóru at fáa øll stigini, men KÍ vendi øllum síðstu 10 minuttirnar.

Durita Hummeland javnaði, tá 82 minuttir vóru spældir, og hon var aftur upp á spæl fimm minuttir seinni, tá hon skoraði til 2-1.

Síðan skeyt Sólja Ernstsdóttir sítt fyrsta mál fyri KÍ, áðrenn Tórun Højgaard Joensen skoraði til 4-1 fýra minuttir inni í yvirtíðini.