Straight Ahead og Hjarnar

Straight Ahead og Hjarnar
Tvey av best umtóktu orkestrunum í Føroyum í 70-árunum vóru bæði úr Klaksvík. Straight Ahead og Hjarnar
Oddamenninir í fremstu føroysku rokkbólkunum í sjeytiárunum, ið báðir vóru úr Klaksvík. Karl Martin Samuelsen úr Hjarnum og Jørgin Dahl úr Straight Ahead
Mynd: Privat mynd  
 
14.05.2024 - 23:00

Straight Ahead og Hjarnar vóru høvuðsnøvnini á stóru Skansastovukonsertunum í Havn seinnu 70-árini. Har kappaðust tey um at vinna áhoyrarans tokka sum besta rokkorkestur í landinum.

Í veruleikanum vóru manningarnar nær skyldar. Tveir í hvørjum orkestri vóru beiggjar. Yngri beiggi Archie Black, basspælari í Straight Ahead - Hans - var trummuspælari í Hjarnum. 

Í Klaksvík var eftir øllum at døma trot á gittarspælarum hesi árini. Í 1977 fóru báðir bólkarnir til Havnar eftir skikkaðum gittaristum.

Í einum húsum funnu teir báðar. Eldri bróðirin, Hans Carl, fór upp í Straight Ahead, og tann yngri, Hildibjartur, endaði í Hjarnum.

 

Tveir stinnir oddamenn

Avgerandi munurin á Straight Ahead og Hjarnum vóru høvuðsmenninir báðir.

Fremstur á palli í Hjarnum stóð oddamaðurin við góðu sangrøddini, Karl Martin Samuelsen. Hin - Jørgin Dahl - dugdi sum eingin annar at skriva sangir.

 

Hjarnar var fyrst og fremst eitt vælsvingandi dansiorkestur, sum fekk lív í fjøldina. Í 1977 skriva teir kortini tveir sangir, sum verða tiknir upp í Danmark um heystið, og komu á plátu stutt eftir.

Sangirnir vóru "Bad Dream" og "Her Love".  Fyri at tekkjast donskum og útlendskum áhoyrarum kallaðu teir seg í staðin Sunny. Men stutt eftir tóku teir upprunaheitið á seg aftur.

 

Jørgin upp í Hjarnar

Ikki fyrr enn Straight Ahead góvust í 1978, og Hjarnar fekk Jørgin Dahl at koma upp í hjá teimum, kom gongd á plátuútgávuvirksemið.

Jørgin var fullur í sangum, og tað kom væl við hjá Hjarnum.

Í 1979 taka teir fleiri sangir upp í útvarpinum, og har liggja teir enn. Nevnast kunnu "All Right" og diskolagið "I Can't Give What You Want", ið kann hoyrast her niðanfyri. 

 

I_Can_Give_What_You_Want_-_Hjarnar__1979_

 

Í 1982 kemur onnur singleplátan við sangunum "Into The Night" og "Breaking My Heart", sum vórðu tiknir upp í Danmark á sumri 1981.

Og í 1984 kom LP-plátan "We Come For You".  Hjarnar vóru tá givnir, og Jørgin Dahl flutti árið eftir til Danmarkar.

 

Í Klaksvík - og í Føroyum við - vóru ungfólk ivaleyst ójøvn á máli um hvør av hesum báðum bólkunum var tann besti í landinum. Hjá nógvum var tað soleiðis, at tú skuldi vera í parti við øðrum heldur enn at siga, at tær dámdi báðar.

Sum live-bólkar skaraðu báðir framúr.

 

Hans Carl Hansen á gittaranum og Edward Ziska á trummunum í Straight Ahead vóru kanska úmælingar sum instrumentalistar, men báðir bólkarnir dugdu at fáa tónleikin at svinga og áhoyrarar at lurta.

Straight Ahead legði størri dent á at framføra sínar egnu sangir og geva teir út á plátu. Hjarnar helt ikki á hesa slóðina av álvara fyrr enn seinni. Men tá var Straight Ahead ikki longur til.

Jørgin Dahl skrivaði nakrar av sínum perlum eftir at hann var farin upp í Hjarnar.

 

Hin kendasti man vera "Breaking my heart", sum Karl Martin so meistarliga syngur. Í 1985 var sangurin kosin at vera næstbestur í stórari evropeiskari sangkapping, sum Radio Luxembourg skipaði fyri.

Til stutttleikar kann nevnast, at meðan Heri Ellingsgaard fann navnið "Straight Ahead" á einari plátu hjá Jimi Hendrix, var tað hin mentaði Hans bóndi á Biskupsstøð - abbi Archie og Hans - sum kom við tí norrøna navninum á hinum bólkinum.

Hjarnar er úr Høgnatátti í Sjúrðarkvæðunum. Hann er annar av yngru synunum hjá Guðruni, sum býr við Júkagarðar. 


Hjarnar á palli í Daddys Dance Hall í Keypmannahavn 1981. F.v.: Jógvan Olsen, Eyðun Nolsøe, Hans Black (hómast), Karl Martin Samuelsen, Graham Stewart og Jørgin Dahl.
 
Straight Ahead Hjarnar
1973-1974
Jørgin Dahl, sangur og ljómborð
Heri Ellingsgaard, gittar
Archie Black, bass
Edward Ziska, trummur
Agnar Joensen, floyta
1977-1980
Karl Martin Samuelsen, sang
Hildibjartur Hansen, gittar
Jógvan Olsen, ljómborð
Eyðun Nolsøe, bass
Hans Black, trummur
Jørgin Dahl, ljómborð, sang (1979-)
1975-1976
Jørgin Dahl, sangur og ljómborð
Petur Hans Poulsen, gittar
Archie Black, bass
Edward Ziska, trummur
1980-1983
Karl Martin Samuelsen, sang
Jørgin Dahl, ljómborð, sang
Graham Stewart, gittar
Jógvan Olsen, ljómborð
Eyðun Nolsøe, bass
Hans Black, trummur
1977-1978
Jørgin Dahl, sangur og ljómborð
Hans Carl Hansen, gittar
Archie Black, bass
Edward Ziska, trummur
 

 

Er kopiera
Nýggjastu sendingar í ÚV
Týsdag 25. juni
RagnarRokk á Copenhell 2024
177216
Týsdag 25. juni
Morgunlestur týsdagur 25. juni 2024
177127
Mánadag 24. juni
Biltúrurin 2: Koyrt verður í Sumba
176599
Mánadag 24. juni
Áki fluktaði KÍ úr FM-stríðnum
177176
Mánadag 24. juni
Søgan um Hank Williams (2:8)
176855
Nýggjastu sendingar í SV
Leygardag 22. juni
Video: 5mf kvinnur, Jóansøka 2024
177125
Leygardag 22. juni
Video: 10mf, Jóansøka 2024
177123
Leygardag 22. juni
Video: 6mf_menn, Jóansøka 2024
177120