Harður retorikkur eftir úrslitaleysa semingsroynd

Tá tað fyri løtu síðani var greitt, at semingsroyndin á Hotel Føroyum er endað úrslitaleys, komu báðir partar í verkfallinum við hvør sínari fráboðan. 

Føroya Arbeiðsgevarafelag skrivar millum annað soleiðis:

"Tá forfólkini í teimum fýra arbeiðarafeløgunum gjørdu sær tann ómak at senda út eina yvirlýsing um, at tey vildu samráðast, hildu vit, at tey meintu nakað við tað. Men har var eingin vilji at flyta seg yvirhøvur, og tað hava vit ongantíð upplivað í slíkari samráðing áður."

Og víðari skriva arbeiðsgevararnir:

"Vit halda tað verða óseriøst og ábyrgdarleyst at senda yvirlýsing út, fyri síðani at gera tað øvugta av tí, man hevur signalerað. Fyri at siga tað akkurát sum tað er, so føla vit okkum hildin fyri gjøldur. Vit vita, at tað eru nógvir føroyingar, sum veruliga høvdu vónað, at semingsroyndin bar á mál, og vit kunnu bara harmast, at tað ikki eydnaðist. Men fortreytin fyri einari semju er, at mótparturin eisini vil samráðast og flyta seg, og tað var tíverri ikki støðan í hesari semingsroyndini."

Tey fimm arbeiðarafeløgini í verkfalli siga í síni fráboðan eftir úrslitaleysu semingsroyndina, at tey eru greið yvir, at gerandisdagurin hjá fólki er nógv órógvaður av verkfallinum, og tí harmast tey um, at semingin ikki bar á mál. Víðari skriva tey:

"Okkara átøk skulu fyrst og fremst raka limirnar í Føroya Arbeiðsgevarafelag. At Vinnuhúsið hevur biðið sínar limir um at skerja lønina hjá øðrum starvsfólki, ið ikki fær møtt til arbeiðis orsaka av verkfallinum, leggur bara stein oman á byrðu hjá vanligum fólki. Tí hava vit avgjørt at virka fyri, at dagstovnar aftur kunnu lata upp. Vit geva tí undantøk á dagstovnaøkinum, til reingerðarfólk og burturbeining av ruski frá mánamorgni 10. juni, soleiðis, at barnafamiljur aftur sleppa til arbeiðis. Vit vita, at vit bert røkka á mál, við at leggja enn størri trýst á arbeiðsgevararnar, ið ikki fáa útflutt ella innflutt vøru, og sum ikki fáa brennievni."

Les eisini: Verkfallið heldur fram