Tjóðartingsval í Fraklandi

Flokkurin Rassemblement National, Tjóðar endursavnan, verður mettur at fáa flestu atkvøðurnar.

Tað skrivar danska kringvarpið.

Tað er 28 ára gamli Jordan Bardella, sum er formaður í Rassemblement National. hann er m.a. kendur fyri at brúka sosiala miðilin Tik tok at føra valstríð, har hann hevur 1,7 milliónir fylgjarar.

Tjóðar endursavnan væntast at fáa 35 prosent av øllum atkvøðunum, meðan miðsavnandi samgongan hjá Emmanuel Macron, forseta, Ensemble, væntandi bert fær 21 prosent av atkvøðunum. Tað eru færri atkvøður enn bæði høgravongurin og vinstravongurin fáa sambært veljarakanningum. Vinstravongurin fær væntandi 28 prosent av atkvøðunum.

Um hetta gerst veruleiki á valinum, kann støðan í Fraklandi gerast rættiliga rokmikil.

Tí, uttan ein greiðan meiriluta kann tað gerast torført, um ikki ógjørligt, at stovna eina samgongu. Og í Fraklandi er lógin soleiðis, at tað skulu ganga 12 mánaðir ímillum hvørt valið - so um ongin samgonga verður stovnað, kann landið liggja politiskt lamið upp í eitt ár.

Valið í dag er ikki heilt endaligt. Avgerandi valumfarið verður hildið næsta sunnudag.