Fleiri barsilspengar

Hámarkið fyri barsilspening hækkaði 1. juli.

Tað er nú 30.000 kr. um mánaðin. Tað var 25.000 kr.

Tá lógin um barsilsgjald kom í 2001, var útgjaldshámarkið 35.000 krónur.

Men í 2004 setti løgtingið gjaldið niður í 25.000 krónur. 

Tað verður mett at kosta Barsilsskipanini 16,3 mió. kr. um árið at hækka hámarkið.

Hjá teimum, sum hava rætt til størri barsilspening, hendir hækkingin sjálvvirkandi.

Broytingin umfatar bæði tey, sum longu eru í barsili, og tey, sum søkja eftir 1. juli.

Studni telur við

Ein onnur broyting í barsilslógini er, at nú telur studningur frá Studna við í útrokningargrundarlagnum hjá nýútbúnum, sum skulu í barsil. 

Henda broytingin er bara galdandi fyri tey, sum søkja um barsilspening frá 1. juli í ár.

Kunngerðin, sum ásetir neyvari reglur um útrokningargrundarlagið, er ikki komin enn.

Tí ber ikki til at siga heilt neyvt, júst hvussu studningurin kemur at telja við.