Rudolf í Vindagnum: Einki kann sum tónleikur sameina fólk

Vertur í Vindagnum hesa ferð er Rudolf Joensen, tónleikari, fyrrverandi lærari og gekkavertur.

Rudolf Joensen var føddur í 1953 og vaks upp í Klaksvík. Børnini vóru fyri tað mesta í sínum grannlagi og kendu als ikki tey, ið búðu aðrastaðni í býnum. 

Skúlin var øðrvísi tá. Virðingin fyri lærarunum var stór og disiplinin hørð. Kom tað fyri, at tú var ov seinur, bleiv tú sendur oman í stovu 105 at skriva: “Sein kúgv fær skitið gras” einar 30 ferð. Var so illa statt, at tú hevði verið ólátaður, vóru aftur boð eftir tær í stovu 105. Tá skuldi skrivast: “Søtur er sjálvgivin biti.” 

Rudolf Joensen

Dýrdarløtur í Russlandi

At tónleikur kann sammeina fólk tvørturum landamørk og mentanir, sannaði Rudolf Joensen á 20. hædd í einum íbúðarblokki í Moskva, har sonurin, sum var í lestrarørindum, búði hjá lokalari familju. Hann og sonurin høvdu válað í býnum allan dagin, og Rudolf var vorðin nakað eymur um føturnar.  
 
Sonurin og drongurin í húsinum skuldu á eina veitslu hetta kvøldið, og tá skipaðu mamman og omman í íbúðini so fyri, at Rudolf fekk fótabað. Hon setti baljuna á gólvið, sletti nakrar svalandi salvur í og bað føroyingin fara úr buksunum og lyfta beinini í baljuna.
 
Meðan hann sat har, bar Rudolf eyga við ein gittar. Hann fekk ljóðførið upp í hendurnar og fór at spæla.  Fyrst teir fáu russisku, hann dugdi. Síðani royndi hann seg við ymsum føroyskum, eitt nú Rasmus hjá Birna Dam. Tað vísti seg, at Rasmus var ógvuliga væl móttikin í Moskva. Rudolf sang og russisku kvinnurnar murraðu hugagóðar. 
 
Rudolf hevði lagt til merkis, at tað mesta í Russlandi er í moll. Sjálv fólkasálin er í moll. Hetta fekk hann at hugsa um sangin Papirsklip hjá Kim Larsen, sum eisini er í moll. Væl var valt, tí russisku kvinnurnar tóku sangin til sín, sungu og blivu rørdar. 
 
Tá dreingirnir komu aftur í íbúðina, vóru teir heilt ovfarnir av góðu samanrenningini, sum var millum føroyingin og russisku kvinnurnar. Hesa løtuna sannaði Rudolf, at einki kann sum tónleikur sameina fólk. 

Triði partur av Vindagnum

Rudolf Joensen er vertur í triðja parti av Vindagnum, har hann millum annað hugleiðir um disiplin í fólkaskúlanum, at geva børnum ábyrgd og hvussu tónleikur kann nýta fólk saman.

Tú kanst hoyra triðja partin her. 

Tónleikur, sum Rudolf hevur valt til sendingina:

1. Leroy Van Dyke - Walk on By
2. Choir of the Don Cossacks - Moscov Nights
3. Kim Larsen - Papirsklip