Finskir marknavørðar kunnu senda flóttafólk heimaftur

Finski ríkisdagurin hevur í dag samtykt eina nýggja lóg, sum gevur marknavørðum loyvi til at senda flóttafólk, sum biðja um friðskjól, heimaftur.

Tað skrivar norska kringvarpið NRK.

Hetta hendir, eftir at nógv flóttafólk seinasta árið eru komin úr Russlandi til finska markið, har tey biðja um friðskjól. Finskir myndugleikar halda, at Russland ger hetta við vilja, sum eitt aftursvar til, at Finnland er vorðið limur í NATO.

Tey mongu flóttafólkini úr Russlandi høvdu við sær, at Finnland stongdi markið til Russlands, og síðan mars mánaði hava eingi russisk flóttafólk biðið um friðskjól í Finnlandi.

Finski ríkisdagurin

Finski ríkisdagurin. (Savnsmynd)

Undantakslóg

Nýggja lógin, sum hevur fingið heitið "avvísingarlógin", verður roknað sum ein sonevnd undantakslóg, og gevur marknavørðum heimild til at fremja tíðaravmarkað brot á grundlógina, sum tað verður sagt.

Møguleikin at biðja um friðskjól er annars ein grundleggjandi rættur í finskari lóg eins væl og í ES-lóg. Løgfrøðingar hava sagt, at ES kann stevna Finnlandi fyri brot á fólkarættin, nú hendan nýggja lógin er komin í gildi.

Lógin var samtykt í ríkisdegnum við 167 atkvøðum fyri og 31 ímóti, skrivar NRK.