Vága kommuna fær átalu fyri handfaring av innlitsmáli

Vága kommuna hevur fingið átalu frá Løgtingsins umboðsmanni fyri handfaring sína av einum máli um innlit.

Umboðsmaðurin mælir kommununi til at dagføra mannagongdir fyri viðgerð av innlitsumbønum.

Talan var um eina klagu um vantandi svar frá Vága kommunu um innlit í egið mál.

Vága kommuna svaraði ikki innlitsumbønini hjá klagaranum skjótast gjørligt, og kunnaði heldur ikki klagaran um, nær avgerðin kundi væntast, tá ið 10 dagar vóru farnir, sum hon skal sambært fyrisitingarlógini.

Heldur ikki sást í latna innlitinum, hvussu nógv skjøl vóru í málinum.

Umboðsmaðurin gav tí Vága kommunu átalu fyri handfaringina av málinum, og mælti kommununi til at dagføra mannagongdina fyri viðgerð av innlitsumbønum.

Umboðsmaðurin kannaði í vetur viðgerð av málum um alment innlit í størru kommununum.

Tá minti hon Vága kommunu á lógarásettu krøvini til viðgerðartíð, at játtanarskriv eiga at sýna greitt, hvussu nógv skjøl eru tilsamans í málinum, og um innlit verður latið í tey øll.