Flogvanlukka í Brasil: Øll 61 fólkini umborð lótu lív

Øll tey 61 fólkini umborð á flogfarinum, sum datt niður í Vinhedo nærhendis Sao Paulo í Brasil í gjár, hava latið lív.

Tað sigur flogfelagið Voepass, sum hevði flogfarið í flúgving.

Enn er ikki greitt, hví flogfarið datt niður, men svarti kassin, sum gevur týðandi upplýsingar í arbeiðnum við at kanna flogvanlukkur, er funnin, siga brasilsku myndugleikarnir.

Nógv fólk á jørðini sóu flogfarið detta niður og tóku tað eisini upp á film. Hesar upptøkurnar vísa, at flogfarið datt einar 4.000 metrar upp á 1 minutt, og at tað datt beint niður, meðan tað flutti seg í snyrlum.

Serfrøðingar meta hetta vera prógv um, at flogfarið hevur "stallað", sum tað eitur á fakmáli. Tað hevur mist ferðina, og flogskiparin hevur ikki megnað at fingið ferðina upp aftur.