Stjórnarleiðarar: Kríggið í Gaza skal steðga nú

Kríggið í Gaza, sum hevur vart í meira enn 10 mánaðir, skal steðga nú.

Tað siga stjórnarleiðararnir í Stórabretlandi og Týsklandi, umframt franski forsetin, í felags fráboðan.

Keir Starmer, Olaf Scholz og Emmanuel Macron heita á Ísrael og Hamas um at skriva undir eina vápnahvíld beinanvegin. 

Bardagarnir mugu steðga nú. Allir gíslar, sum Hamas framvegis hevur í varðhaldi, skulu latast leysir. Tað stendur millum annað í felags fráboðanini úr Bretlandi, Týsklandi og Fraklandi.

Gaza

40.000 hava latið lív

Leiðararnir vísa eisini á, at fólkið í Gaza hevur tørv á neyðhjálp, alt fyri eitt. 

Teir heita í sama viðfangi á Iran teirra sameindu um ikki at leypa á Ísrael, tí tað vil bara gera støðuna í økinum enn meira spenta.

Roknað verður við, at útvið 40.000 fólk hava latið lív í Gaza, síðani kríggið brast á 7. oktober í fjør. 

Tølini eru frá palestinsku heilsumyndugleikunum, og eru ikki váttað av øðrum. Men sambært tíðindastovuni NTB hevur ST mett tølini at vera álítandi.

Sambært heilsumyndugleikunum eru flestu av teimum deyðu kvinnur og børn, og tey taka ikki dagar ímillum herfólk og sivilfólk. Ísrael metir, at umleið ein triðingur av teimum deyðu eru herfólk, skrivar NTB.