Rektarin á Glasi: Glað fyri at frágreiðing staðfestir feilir

Barna- og útbúgvingarmálaráðið gjørdi feilir, tá ráðið ógildaði uppsøgnina av Elsu Mariu Holm Olsen, útbúgvinarstjóra á Glasi. 

Tað staðfestir frágreiðing, ið Christian Andreasen, sakførari, hevur gjørt um málið. 

Elsa Maria Holm Olsen varð søgd úr starvi orsaka av bygnaðarbroytingum, men hon kærdi uppsøgnina.

Barna- og útbúgvingarmálaráðið gav henni viðhald og ógildaði avgerðina hjá rektaranum. 

Una Joensen vildi ikki góðtaka niðurstøðuna hjá Barna- og útbúgvingarmálaráðnum og vísti stórt sæð øllum tí faktuella grundarlagnum undir avgerðini hjá Barna- og útbúgvingarmálaráðnum aftur.

Una Joensen

Rektarin hevði rætt

Frágreiðingin hjá Christiani Andreasen, sakførara, staðfestir, at Una Joensen hevði rætt í sínum atfinningum móti ógildingini.

Sakførarin mælir kortini til, at avgerðin hjá Barna- og útbúgingarmálaráðnum, um at ógilda uppsøgnina av Elsu Mariu Holm Olsen, verður standandi. 

Tað hevur Barna- og útbúgvingarráðið eisini boðað rektaranum á Glasi frá í telduposti, har ráðið eisini viðgongur, at umsitingarligir feilir eru gjørdir í málinum.  

Rekatarin á Glasi fegnast um, at frágreiðin hjá Christiani Andreasen, sakførara, vísir at Barna- og úbúgvingarmálaráðið gjørdi feilir, tá tey ógildaðu uppsøgnina av Elsu Mariu Holm Olsen, útbúgvingarstjóra.