Stórur áhugi fyri Ítróttaháskúlanum í Suðuroy

48 næmingar byrjaðu á heystskeiðinum hjá Ítróttaháskúlanum í Suðuroy mánadagin, og tey kunnu gleða seg til eitt hálvt ár við spennandi upplivingum. Men fyrst er introvika

Mynd: Ítróttaháskúlin í Suðuroy á Facebook

Uni L. Hansen

14.08.2024 - 15:54

Mánadagin var fyrsti skúladagur á heystskeiðinum á Ítróttaháskúlanum í Suðuroy, og sambært Suðurrás, so sást hetta eisini aftur í Vági mánadagin, tá stór mannamúgva og hópurin av bilum vóru savnað við næmingaheimið hjá Ítróttaháskúlanum.

Tilsamans 48 næmingar byrjaðu á heystskeiðinum í gjár, og fara teir at fáa upplivingar bæði í nærumhvørvinum hjá Ítróttaháskúlanum í Vági og eisini kring landið og á uttanlandsferð.

Sum vant byrjaði heystskeiðið við introviku, har næmingarnir læra hvønn annan at kenna.

Ítróttaháskúlin í Suðuroy er ein sera væl umtóktur háskúli, og sæst hetta eisini aftur í tilmeldingunum, bæði nú í heyst og til komandi várskeið.

Ítróttarháskúlin í Suðuroy

Um Ítróttaháskúlan í Suðuroy

Ítróttaháskúlin í Suðuroy er ein fólkaháskúli, staðsettur í Vági, hvørs endamál er at veita ungdóminum kunnleika, fimi og arbeiðshættir, sum stuðla tí einstaka næminginum í fjølbroyttari persónligari menning.

Ítróttaháskúlin er skipaður sum partur av Háskúlanum í Suðuroy. Háskúlin eigur at virka fyri persónligari menning hjá tí einstaka, bæði viðíkjandi evnunum, ið undirvíst verður í, men eisini viðvíkjandi leiklutinum hjá tí einstaka sum partur av einum felagsskapi og í samfelagnum.

Háskúlin kann m.a. bjóða út undirvísing í ítrótti, list og mentan. Dentur verður lagdur á, at undirvísingin er á høgum støði við miðvísari menning av næminginum í huga. Háskúlin kann samstarva við aðrar skúlar, felagsskapir og stovnar í sambandi við undirvísingina.

Háskúlin er ætlaður ungum, sum eru liðug við fólkaskúlan, tvs. ungum úr 10. flokki og eldri.

Les meira um Ítróttaháskúlan í Suðuroy her.