Revsiváttan verður helst kravd

Tað eigur at vera krav, at útlendingar skulu koma við revsiváttan, tá teir søkja um arbeiðs- og uppihaldsloyvi í Føroyum.

Tað sigur Bjarni Kárason Petersen, landsstýrismaður.

Beinir Johannesen, løgtingsmaður, spurdi hann um revsiváttan hjá útlendingum, sum vilja arbeiða í Føroyum.

Landsstýrismaðurin sigur, at hann fer at biðja danska ráðharran í útlendinga- og integratiónsmálum um at gera reglur, sum krevja revsiváttan.

Lógin loyvir treyt

Bjarni Kárason Petersen sigur, at bæði landsins myndugleikar og arbeiðsgevarar eiga at ansa eftir, at útlendingar, sum koma til Føroya at arbeiða, ikki eru dømd brotsfólk.

Hann heldur, at í fyrstu syftu eiga fyritøkur, sum fáa útlendingar higar at arbeiða, at krevja revsiváttan.

Føroyska útlendingalógin loyvir, at slíkar treytir kunnu leggjast á arbeiðsloyvi.

Danski ráðharrin og landsstýrið kunnu samráðast um hesar treytir, sigur Bjarni Kárason Petersen, sum fer at tosa við ráðharran.