Føroyskur heimsmeistari í backgammon fyri lið

"Eg hevði aldrin trúð, at eg skuldi vera heimsmeistari í nøkrum," staðfestir Anna Sofía Jørgensen úr Miðvági á sínum Facebook-vanga í morgun.

Saman við bretanum Oliver Squire, ið er stórmeistari og yrkisleikari í backgammon, vann Anna Sofía Jørgensen fyrstu heimsmeistarakappingina í backgammon fyri lið, sum bleiv hildin á backgammon-stevnu í týska býnum Aachen.  

Anna Sofía Jørgensen ásannar, at tey ikki høvdu væntað at vunnið kappingina. 

"Eg kenni meg sera takksama og eyðmjúka um, at Oliver spurdi, um eg vildi vera hansara partnari í hesari kappingini."

Anna Sofía Jørgensen, Oliver Squire, Backgammon

Anna Sofía Jørgensen og Oliver Squire til høgru á myndini áðrenn finaluna móti japanska parinum

Epilepsi var startskotið

Orsøkin til, at Anna Sofía Jørgensen er vorðin so dugnaliga til at spæla backgammon, er heldur óvanlig, tí startskotið var, at hon fekk staðfest epilepsi. 

"Eg byrjaði at spæla hetta spælið, fyri at venja mín heila uppaftur eftir at hava fingið epilepsi og nakað nógvar heilaskjálvtar og nógvar krampar," skrivar Anna Sofía Jørgensen á sínum Facebook-vanga. 

"Backgammon er eitt spæl, sum er sera visuelt, og har ein skal rokna statistikk so at siga alla tíðina. Tað er tó heilt øðrvísi enn talv, tí terningar eru við í spælinum. Hvør spælari hevur tveir terningar, og heimsins bestu spælarar í backgammon plaga at vinna eini 60 prosent av sínum spølum."

Bara eitt frítíðarítriv

Hóast hon er vorðin heimsmeistari í backgammon, so hevur Anna Sofía Jørgensen, ið er búsitandi í Keypmannahavn, ongar ætlanir um at gerast yrkisleikari. 

"Eg lesi til musikklærara, og mær dámar tað sera væl. Backgammon er tó mítt frítíðarítriv, sum eg gangi upp í við lív og sál, og tað haldi eg er stuttligt."