- Tíðindi, mentan og ítróttur
Mikkjal besti venjari í august
![](https://kvf.fo/sites/default/files/styles/grein-ovasta-mynd/public/mikkjal_thomassen_aik_ok.jpg?itok=oJpkT7U4)
Mikkjal Thomassen er valdur til besta venjarin í august í bestu svensku fótbóltsdeildini, Allsvenskan.
Tað hendir, eftir at føroyingurin hevur leitt AIK til fimm sigrar á rað. Høvuðsstaðarfelagið hevur vunnið á Västerås, Mjallby, Djurgården, Brommapojkarna og Värnamo.
- Eg eri væl nøgdur við gongdina í seinastuni, og arbeiðið við at byggja mentan og menna liðið heldur fram. Hetta er eitt liðavrik. AIK hevur eitt frálíkt leiðslutoymi, sum arbeiðir hart og stuðlar mær í at skapa tær bestu rammurnar fyri spælararnar, segði Mikkjal Thomassen við heimasíðuna hjá felagnum.
Tá fyrrverandi KÍ-venjarin tók við starvinum miðskeiðis í juli, lá AIK mitt á stigatalvuni, men nú bjóðar stórfelagið av í kappingini um evropeisku plássini.
AIK liggur á fimta plássi, men bert trý stig eru upp til Djurgården, sum er nummar trý.