Frískúlin í Havn: Eykaaðalfundurin var ikki viðtøkuførur

Ov fá fólk møttu á eykaaðalfundi hjá Frískúlanum í Havn á Velbastað í gjárkvøldið, tá lagnan hjá skúlanum skuldi avgerast.

Fundurin var sostatt ikki viðtøkuførur, og nýggjur eykaaðalfundur er lýstur at vera 21. oktober.

Tað sigur Búgvi Dalsgarð, stýrisformaður á Frískulanum í Havn.

Eins og á eykaaðalfundinum, sum skuldi vera í gjárkvøldið, er eittans mál á skrá fyri fundin 21. oktobur. Tað er uppskot um at taka Frískúlan í Havn av.

Viðtøkurnar fyri Frískúlan í Havn siga, at tveir triðingar av limunum skulu atkvøða fyri tí, um skúlin skal takast av.

Meiriluti fyri

Sambært stýrisformanninum tók ein meiriluti av teimum, sum møttu á eykaaðalfundinum í gjárkvøldið, undir við at taka skúlan av. Men eykaaðalfundurin var sum nevnt ikki viðtøkuførur.

Búgvi Dalsgarð sigur við útvarpið, at tað hevur verið stór frágongd av næmingum, síðani tíðindini bórust um støðuna á skúlanum og ætlanina at taka skúlan av.

- Skúlagongd er tó framvegis, og enn er ikki greitt, nær Frískúlin í Havn letur aftur, sigur Búgvi Dalsgarð.

Nýggjur eykaaðalfundur er lýstur at vera 21. oktober.