0,2% møguleika at eydnast? Ja takk, tað taki eg!

Hon er komin langt, síðan hon sum tannáringur fekk at vita frá einari kvinnu á arbeiðsloysisskipanini eitt stað í Jyllandi, at hon bert kundi brúkast til at mála garð, tí hon ongar førleikar hevði.

- Eg var tveitt úr skúlanum í 7. flokki, havi ikki havt støddfrøði síðan í 4. flokki, havi búð til fosturs og á barnaheimi, og tá eg fekk at vita, at tað einasta, eg kundi brúkast til, var at mála garð, so flutti eg av landinum, og tað skuldi vísa seg at gerast byrjanin til eina altjóða starvsleið, sigur Solaima Gourani, sum í dag vitjar á vinnudegnum hjá Vinnuhúsinum.

Tað, at hon fekk eitt skump út í heim, var tað rætta fyri hana, og er tað eisini fyri tey, sum eru sum hon, tí úti í heimi eru fólk, sum ikki leggja so stóran dent á útbúgving, men heldur á persónin og teir eginleikar, sum eru.

- KT-vinnan er sera væl egnað til teirra, sum eru eitt sindur øðrvísi, eisini í dag, tí her nýtist tær ikki at hava eina útbúgving. Eg vaskaði jú vesir, áðrenn eg fekk starv í KT, og í hesari vinnu kanst tú saktans eydnast, um tú bara arbeiðir hart og gevur tær stundir til at seta teg inn í tingini, sigur Soulaima.

Hon býr og starvast í dag í Silicon Valley í USA, sum er heimsins KT-miðdepil, og sum vanliga ikki hevur pláss fyri nógvum kvinnum. Soulaima hevur tó sítt egna virki, Happioh, sum ger forrit til stórar fyritøkur, ið skal gera tað lættari hjá teimum at skipa sítt fundarvirksemi.