Orbán fekk kalda móttøku í ES-tinginum

Ungarski forsætisráðharrin, Viktor Orbán, fekk kalda móttøku, tá hann helt røðu í ES-tinginum í dag. 

Ursula von der Leyen, forkvinna í ES-nevndini, fanst hvassliga at Orban, og at Ungarn framvegis samstarvar við Russland á fleiri økjum. 

Tað skrivar danska kringvarpið.

Viktor Orbán var annars møttur í ES-tinginum fyri at tosa um raðfestingarnar fyri ungarska formanskapin. 

Viktor Orbán hevur í fleiri førum gjørt tað øvuta av tí, sum forkvinnan í ES-nevndini  og flestu limalondini eru vorðin samd um at gera, síðan kríggið í Ukraina byrjaði.

Ursula von der Leyen

Ursula von der Leyen, forkvinna í ES-nevndini, fanst hvassliga at Viktor Orbán og segði, at ES-londini fara framvegis at stuðla Ukraina. (Mynd: Reuters/Ritzau Scanpix)

Eiga at hava gott samband við Putin

Í staðin fyri at lata Ukraina stuðul, heldur forsætisráðharrin í Ungarn tað vera týdningarmikið framvegis at hava gott samband við russiska forsetan, Vladimir Putin.

Hann heldur tað vera skeivt, at ES er í parti við Ukraina. Í staðin áttu ES-londini at trýst eina vápnahvíld ígjøgnum, so at friður verður millum partarnar.

Men tað tekur Ursula von der Leyen als ikki undir við.

- Vit evropearar hava ymisk mál, men tað er onki evropiskt mál, har tað at yvirgeva seg, er tað sama sum friður, sigur hon, og ger púra greitt, at ES-londini fara framhaldandi at stuðla Ukraina. 

Eftir røðuna reistust fólk í salinum og klappaðu fyri henni.