Ákæra Suðurkorea fyri at senda dronur yvir Pyongyang

Norðurkorea ákærir Suðurkorea fyri at senda dronur yvir høvuðsstaðin, Pyongyang, og kallar hetta fyri eina “politiska og hernaðarliga provokatión”, sum kann føra til vápnað stríð.

Tað sigur uttanríkisráðið í Norðurkorea, sambært Reuters.

Sambært Norðurkorea flugu dronurnar um náttina bæði í síðstu viku og í hesi vikuni, og sleptu fleiri anti-norðurkoreansk smárit yvir høvuðsstaðin.

Hendingin krevur hevnd, sigur Norðurkorea. 

Men søgan hevur einki upp á seg, tí herurin hevur ikki sent nakra dronu yvir Norðurkorea, upplýsir verjumálaráðharrin í Suðurkorea, sambært suðurkoreansku tíðindastovuni Yonhap.

- Tað hava vit ikki gjørt. Eg kennist ikki við støðuna, sigur Kim Yong-hyun, verjumálaráðharri.