Føroyingar stríddu seg til sigurs

Slakir 10 minuttir vóru spældir, tá Adrian Justinussen royndi skotfótin fyrstu ferð, men bólturin fór framvið handaru stong umvegis eitt mótstøðubein.

Annars var tað í stóran mun heimaliðið, sum leyp á, meðan føroyingarnir lógu langt afturi á vøllinum við fólkinum og vardu egnan brotsteig.

Tá hálvur tími var farin tók dysturin kortini eina knappa vend. Jóannes Bjartalíð fór  til stroks høgrumegin og vann Føroyum eitt innkast høgrumegin. Tað var kastað langt inn í brotsteigin, og tá bólturin dett niður til Brand Hendriksson Olsen var hann sparkaður, og dómarin peikaði á blettin.

Viljormur Davidsen er fastur skjútti, og liðskiparin var tryggur aftur hesa ferð, og skoraði sítt fimta brotsspark fyri Føroyar.

Armenar trýstu, tað ið eftir var av fyrra hálvleiki, men sæð burtur frá einstøkum skotroyndum útifrá, var lítil vandi á ferð, og føroyingarnir fóru til hálvleiks við leiðsluni.

Seinni hálvleikur

Sama mynstur helt fram eftir steðgin. Føroyar vardu og høvdu sera ilt við at sleppa burturúr tunga heimatrýstinum, sum kortini ikki spældi seg til nógvar stórar málkjansir.

Ikki fyrrenn ein góður tími var spældur, í hvussu er. Tá stóð nógv á føroysku verjuni, og Armenia kom til fleiri skot úr vandamiklum støðum. 

Nærmast kom Lucas Zelarayán, tá hann slapp leysur inni í málteiginum, men vælspælandi Teitur Matras Gestsson bjargaði.

Eitt troytt føroyskt lið stóð lágt og vardi seinastu løtuna av dystinum, og tað var stór frøði á monnum, tá grikski dómarin floytaði fyri seinastu ferð.

Við sigrinum hálaðu Føroyar seg fram á 2. plássi í bólkinum, og hava nú seks stig eftir fimm dystir, meðan Lettland datt niður á niðasta plássi.

Seinni í kvøld tekur oddaliðið í bólkinum, Norðurmakedonia, heima ímóti Lettlandi.