Javnaðarflokkurin vánaligt kommunuval

Í Klaksvík hevði flokkurin lakasta valið higartil, og í Havn var hetta valið tað ringasta síðani 2004. Á Tvøroyri, sum er háborgin, fekk Javnaðarflokkurin bara tveir sessir

Í Havn fór Javnaðarflokkurin í tvíningar. Heðin Mortensen stillaði upp á Javnaðarlistanum, og Tróndur Sigurðsson og Kári Johansen stillaðu upp á Kommunulistanum.

Mynd: Bjarni Árting Rubeksen

Hallur av Rana

19.11.2024 - 13:39

Javnaðarflokkurin stóð seg illa á kommunuvalinum fyri viku síðani.

Í Klaksvík gjørdi flokkurin - sambært valurslit.fo - tað lakasta valið higartil.

Í Havn var úrslitið tað ringasta síðani 2004.

Hetta hendi, eftir at fleiri býráðslimir hjá Javnaðarflokkinum valdu at skipa egna lista, Kommunulistan, og stilla upp móti Javnaðarflokkinum.

Háborgin nógv tódnað

Og á Tvøroyri, har flokkurin meginpartin av farnu øld var størsti flokkur, er hann nú tódnaður niður í tvey umboð.

Enn hevur Kringvarpið ikki fingið fatur á valhagtølum fyri kommununa seinastu øldina, men sambært fleiri søgukønum keldum er talan um eitt tað vánaligasta valið hjá Javnaðarflokkinum yvirhøvur í gomlu háborgini.

Levi Mørk

Levi Mørk skuldi vera borgasrtjóri í Vági, men í løtuni er alt óvist.

Framgongd í Vági

Ljóspunktið var í Vági, har flokkurin gekk fýra prosenstig fram, og eftir telvingini fyrstu dagarnar tóktist at varðveita borgarstjóran. Tó at Levi Mørk skuldi taka við eftir Bjarna Johansen.

Men eisini tað tykist vera óvist, nú Bjarni Johansen ikki vildi skriva undir avtaluna millum Javnaðarflokkin og Sambandsflokkin um samstarv, men í staðin hevur skipað meiriluta saman við Tjóðveldinum.