Til reiðar at møta á fundi

Levi Mørk, sum var toppskorari á javnaðarlistanum á kommunuvalinum í Vági, er nú til reiðar at møta á býráðsfundi, næstu ferð tað verður kallað inn til fundar.

Tað sigur hann í stuttari viðmerking við Kringvarpið í dag.

Arni D. Brattaberg, fyrstvaldur á tjóðveldislistanum, hevur í tveimum førum kallað nývalda býráðið til fundar at skipa nýggjan býráðsmeiriluta, men í hvørgum føri hevur fundurin verið viðtøkuførur, tí øll møttu ikki. 

Men nú sigur Levi Mørk, at hann fer at møta á fundi, næstu ferð tað verður kallað inn.

- Verandi støða kann ikki halda fram, og tíðin er nú komin til at koma víðari, sigur Levi Mørk við Kringvarpið.