Vilja brúka heimafyrimunin ímóti Føroyum

Stórt trýst er á lutfalsliga óroynda og rættiliga unga sveisiska hondbóltslandsliðnum, sum tekur ímóti Føroyum í St.Jakobshalle í Basel seinnapartin.

Skal vertstjóðin spæla seg víðari úr bólkaspælinum, er sigur á føroysku debutantunum helst eitt krav. Hinvegin hava tær umleið 6500 viðhaldsfólk í rygginum, og tað ætla tær at brúka til sín fyrimun.

 - Vit eru undir trýsti. Vit kunnu endurtaka, at vit skulu njóta dystin, njóta stuðulin frá viðhaldsfólkunum, men allir spælararnir vita av trýstinum, sigur bakspælarin, Kerstin Kündig. 

 - Men størsta trýstið kemur frá okkum sjálvum, tú vit vilja vinna og vísa, at vit megna tað. 

Føroyar eru vandamiklar

Sveisisku vertirnir hava góðar vónir til dystin ímóti Føroyum, men hava ongan hug til at undirmeta føroyska liðið. 

 - Hetta er ein trupul dystur, tí vit eru greiðar yvir, at framgongdin hjá teimum hevur verið stór síðstu árini. Tær taka seg alsamt fram og hava sínar styrkir, sigur Kerstin Kündig, og sterki strikuspælarin úr København Håndbold, Tabea Schmid tekur undir við liðfelaganum.

 - Tær hava fleiri góðar einstaklingar, sum spæla í Danmark, so vit mugu fáa tamarhald á teimum. Tær spæla skjótt, og eru góðar ein ímóti einari, so vit mugu standa væl saman. Um vit trýsta tær allar 60 minuttirnar, haldi eg, at vit eiga at vera við yvirlutan, sigur Tabea Schmid.