Ringt jólaveður gav streym uttan olju

Ringa veðrið á jólum gjørdi, at allur streymurin, sum SEV gjørdi í gjár, annan jóladag, var úr vatni og vindi.

Jólaaftan var 89 prosent grønur, og jóladagur var 93 prosent grønur.

Vatnorkan var bulurin í elframleiðsluni um jólini, sigur SEV.

Jólaaftan átti vatnorkan góð 51 prosent og jóladag sløk 63 prosent. 

Í Suðuroynni útvega vindmyllurnar og battarískipanin tó allan streymin, tí vatnorkuverkið í Botni verður umvælt.

Ta løtuna, dunnurnar vóru í ovninum jólaaftan, øktist eftirspurningurin, so tá var neyðugt at tendra motorarnar á Vágsverkinum og Sundsverkinum.

Jólamorgun var nærum eingin vindur, so tá vóru aftur boð eftir Sundsverkinum og Vágsverkinum, sigur SEV.