Sig okkum, hvussu tit halda jól

- Vit eru forvitin at vita, hvørjar jólasiðvenjur eru í Føroyum. Tí hugsa vit, at tað hevði verið áhugavert at gjørt eina roynd at savna íkast til gransking um jól fyrr og nú, sigur Annika Sølvará, stjóri í Granskingarráðnum. 

Hon heitir á fólk um at hugsa um, hvørjar siðvenjur tey høvdu og hava á jólum, og at skriva tankar og eygleiðingar niður og gjarna senda Granskingarráðnum myndir eisini. 

Skriva hvørji tit eru, hvar tit eru á jólum, hvat tit gera undan og á jólum, hvat tit eta, nær tit geva gávur, um tit gera tað sama hvørji jól, hvussu kenslan er, hvat tað besta við jólunum er, og um tú saknar nakað frá fyrr? Hvat kundi tú hugsað tær at gjørt komandi ár? Hesum greiðir Annika frá, og er annað um jól, sum tú hevur hug at fortelja og skjalfesta til eftirtíðina, so skriva tað eisini niður. 

Lurta eftir samrøðuni við Anniku Sølvará í Góðan Morgun Føroyar.

Send hesar hugleiðingar og myndir til Granskingarráðið við telduposti, gransking@gransking.fo

Ætlanin er at geva Landsbókasavninum tilfarið at goyma til gransking.