Sorgardagur í Turkalandi: Í minsta lagi 66 deyð í stórum eldsbruna

Í minsta lagi 66 fólk hava latið lív og 51 onnur hava fingið skaða í einum stórum eldsbruna á einum hotelli í Turkalandi í nátt og í morgun.

Meir enn 230 fólk búðu á hotellinum, sum er í skíðfrítíðarøkinum Kartalkaya í útnyrðingspartinum av landinum, góðar 170 kilometrar frá høvuðsstaðnum Ankara.

Hildið verður, at eldurin kyknaði um 3 tíðina í nátt í eini matstovu á fjórðu hædd á hotellinum, sum hevur 12 hæddir tilsamans.

Sagt verður, at tað var trupult hjá brandbilum at koma til hotellið í nátt orsakað av veðri og frástøðu, og fyrsti brandbilurin var ikki á staðnum fyrr enn ein tíma eftir, at eldurin var fráboðaður. 

Tá sløkkiliðið so kom á staðið, tók tað 10 tímar at fáa tamarhald á eldinum, sum hevði breitt seg til meginpartin av hotellinum.

Enn er ikki greitt, hví eldur kom í, men hetta verður nú kannað. Í sambandi við kanningarnar verða fýra fólk, harímillum hotellstjórin, afturhildin.

Turkiski forsetin Recep Tayyip Erdogan hevur lýst dagin sum almennan sorgardag.

Hotel Turkaland brent

Hotellið, sum er í 12 hæddum, er illa farið av eldinum, sum herjaði í nátt og í morgun. Mynd: Ihlas News Agency/Reuters/Ritzau Scanpix