Illgruni um enn eitt kaðalslit í Eystrasalti

Svenska verjan kannar í løtuni eina fráboðan um møguligt nýtt kaðalslit í Eystrasalti.

Tað skrivar svenska kringvarpið SVT.

Talan er um ein kaðal millum Týskland og Finnland, og brotið skal vera út fyri Gotlandi.

Enn er ógreitt, hvat slag av kaðali, talan er um.

Fleiri tilburðir

Í seinastuni hava fleiri tilburðir verið av kaðalsliti í Eystrasalti. Illgruni er um, at talan er um álop, sum eru gjørd við vilja. Millum annað var eitt kinesiskt skip herfyri undir illgruna fyri at hava framt herverkið.

Kaðalarnir, sum talan er um í Eystrasalti, eru bæði gassleiðingar, samskiftiskaðalar og streymkaðalar.

Svenski forsætisráðharrin, Ulf Kristerson, skrivar á X, at hann tekur nýggja málið um kaðalslit í Eystrasalti í størsta álvara.