Gera klárt til kamping á Mølini

Nú verður enn ein roynd gjørd at fáa lív í aftur stóra kampingøkið á Eiði, sum er á gamla fótbóltsvøllinum niðri á Møl.

Tað eru hjúnini Hertha og Martin Kúrberg, ið nú aftur fara at royna seg, eftir at tey høvdu kampingplássið um hendi frá 2015 til 2020, tá ið corona-farsóttin gjørdi um seg.

Síðani hava onnur roynt seg, men um dagarnar varð sáttmáli gjørdur við hjúnini, ið sostatt í kampinghøpi eru aftur har, sum tey byrjaðu.

Pláss fyri 60 vognum
Frammanundan hava Hertha og Martin eisini kampingplássið í Skálavík undir hond, har pláss er fyri 15 vognum, og á Eiði verður ætlandi pláss fyri 60 kampingvognum.

Í gjár høvdu tey arbeiðsdag í Eiði Camping, har tey gjørdu klárt til hetta komandi kampingárið, og tey vóna at kunna lata upp á páskum.

Hertha og Martin Kúrberg hava gjørt sjey ára sáttmála við Eiðis kommunu um leigu av økinum.

Her kanst tú hoyra samrøðu við Martin Kúrberg: