Talið av pensjonistum er hækkandi

Johnny í Grótinum, formaður í Búskaparráðnum, góðtekur ikki frágreiðingina hjá Bjarna á Steig, stjóra í Heilsustýrinum, um livialdurin hjá føroyingum.

Í tíðindasendingini á nátturða týskvøldið tosaði Bjarni á Steig, stjóri í Heilsustýrinum, um ávirkanir á livialdurin, og tað var í tí sambandinum, at hann kom inn á viðurskifti, sum eru broytt frá fyrr til nú. Ein av orsøkunum var, at færri doyggja ung av vanlukkum í dag, og tað hevur broytt livialdurin munandi.

Men hetta hevur einki við sakina at gera, sigur Johnny í Grótinum, tí tað sum verður tosað um er miðallivialdurin hjá teimum, sum longu eru 65. 

Sambært framrokningum væntast 65 ára gamlir menn at liva til teir eru 85 og kvinnurnar til tær eru 87, og tað er í hesum stóra pensjónsavbjóðingin liggur.

- Útrokningar, sum eru gjørdar fyri Almannaráðið vísa, at vit liva longur, og framrokningarnar fyri restlivialdurin hjá teimum, sum eru 65 ár, væntast eisini at hækka næstu árini, sigur Johnny í Grótinum, formaður í Búskaparráðnum, sum sigur, at tað er alneyðugt at broyta pensjónsaldurin, um vit ikki skulu áleggja teimum, sum koma eftir okkum, at bera stórar skattabyrðar.

Hoyr alt innslagið, sum var í tíðindunum í kvøld her: