Vøksturin í útlendskari arbeiðsmegi er minkaður

Í 2022 var vøksturin í útlendskari arbeiðsmegi 24 prosent, í 2023 var vøksturin 10 prosent og í fjør 2 prosent.

Tað vísir várfrágreiðingin hjá Búskaparráðnum.

Skipanirnar við at fáa útlendska arbeiðsmegi til Føroya hava minkað um arbeiðstrotið í ávísum vinnugreinum og harvið eisini tálmað trýstið á lønarvøkstrinum.

Serliga síðani snarskipanin fyri triðjalond kom í 2021, hevur tilgongdin av útlendskari arbeiðsmegi verið stór.

31 prosent av útlendingum arbeiða í framleiðsluvinnuni, sum serliga fevnir um virking av fiski á flakavirkjum og kryvjivirkjum av laksi. 13 prosent arbeiða í byggivinnuni og 12 prosent arbeiða hjá gistingarhúsum ella matstovum.

Í 2009 vóru 3 prosent av starvsfólkunum í búskapinum ikki føroyingar, í fjør vóru tey 8 prosent, sum svarar til okkurt um 2.300 starsfólk.