Beinir Johannesen um játtanarkarmar: Sláimaskinan er ikki nóg mikið

Beinir Johannesen, formaður í Fólkaflokkinum, er samdur við Magnus Rasmussen í Sambandsflokkinum og Eyðgunn Samuelsen í Javnaðarflokkinum um, at tað ber ikki til bara at brúka sláimaskinuna, um tamarhald skal fáast á almennu útreiðslunum.

Tá Ruth Vang, landsstýriskvinna í fíggjarmálum, legði uppskotið um fíggjarkarmar fyri løgtingið, gjørdist greitt, at fíggjarlógin næsta ár fer at hava eitt hall upp á eina fjórðingsmilliard krónur, ella 252 milliónir krónur.

Í sambandi við framløguna segði Ruth Vang, at samgongan hevði funnið 55 milliónir krónur í sparingum, men hetta er ov lítið sambært Búskaparráðnum. Tað átti at verið nærri 155 milliónum krónum, skal tað hera mun.

Í tíðarskeiðinum frá 2010 til í ár eru almanna- og heilsuútreiðslurnar á fíggjarlógini hækkaðar úr 45 prosentum upp í 55 prosent.

Beinir Johannesen tekur undir við Búskaparráðnum, men arbeiðast má eisini við at gera skipanir effektivari, so meiri fæst burturúr, sigur hann.

Hoyr innslag í útvarpstíðindunum: