Dýrari at brúka flogvøllin

Tað verður dýrari hjá ferðandi at brúka Vága floghavn.

Sum er, rindar hvør ferðandi við fráferð úr Vágum 170 kr. í tænastugjaldi til Vága floghavn sum partur av ferðaseðlakostnaðinum. Hetta gjaldið hækkar 60 kr., soleiðis at tað frá 1. apríl næsta ár verður 230 kr.

- Samsvar skal vera millum útreiðslur og inntøkur, og av tí at krøvini til flogvallarrakstur eru herd munandi seinastu árini, og stórar íløgur eru fyri framman, er neyðugt at hækka tænastugjøldini, sigur Vága floghavn í tíðindaskrivi.

Nýggj farstøð

Størsta íløgan fyri framman er at útbyggja farstøðina, sum er ov trong til støðugt vaksandi talið av ferðafólkum.

Gongst sum ætlað, stendur nýggj farstøð liðug í 2029 ella 2030.

Næstu árini skulu eisini nýggjur hangarur til Atlantic Airways og parkeringspláss gerast, og flogbreytin skal asfalterast.

Vága floghavn fer eisini at gera tillagingar í startgjøldum og støðugjøldum hjá flogførum, og tað verður dýrari hjá okkum at parkera bilin á økinum hjá Vága Floghavn. 

Broytta parkeringsgjaldið fær gildi 1. mai, - prísurin er ikki kunngjørdur enn.