FC Hoyvík fær 10.001 krónur í bót

Málið snýr seg um ein vinardyst millum U17-liðini hjá FC Hoyvík og B71 tann 26. mars.

Beint áðrenn hálvleik fær FC Hoyvík bóltin í málið, og minst 15 ungdómar storma inn á vøllin, bæði spælarar og áskoðarar. 

Tá málið verður kolldømt fyri rangstøðu, rennur ein bólkur av spælarum og ungdómi, sum, sambært dómarafrágreiðingini, høvdu tilknýti til FC Hoyvík, yvir móti linjuverjanum, sum var ein 15 ára gamal drongur og spælari frá B71, har hesin linjuverjin bleiv umringaður og skumpaður.

Dómarin velur at bríksla dystin av og heitur á liðini um at fara av vøllinum.

Bæði spælarar úr B71 og FC Hoyvík hava váttað, at ein drongur hevði givið linjuverjanum nevan, eftir at dysturin er bríkslaður av.

Sum avleiðing av hesum hendingum, so hevur FC Hoyvík valt at taka sítt U17-lið úr kappingini og hevur boðað frá, at felagið fer undir eina innanhýsis tilgongd fyri at tryggja ein framhaldandi virðiligan og góðan felagsskap.