AB, 07 Vestur og Skála telva um at yvirliva

Lagt er upp til botnbrak á Argjum, har AB og 07 Vestur bresta saman í royndini at yvirliva í Meistaradeildini.

Bæði liðini hava 25 stig undan dystinum, men vágamenn hava verri málmun og skulu tí vinna fyri at yvirhála argjamenn, sum ikki hava fyri neyðini at fáa meir enn eitt stig.

Men Skála hevur eisini 25 stig, og endar tað javnt millum AB og 07 Vestur, fara skálamenn niður, um teir samstundis tapa fyri EB/Streymi.

NSÍ fær gullið á Svangaskarði

Aðrastaðni fær NSÍ steyp og heiðursmerki eftir dystin ímóti grannunum á Svangaskarði, B68, sum hinvegin spæla sín síðsta dyst í Meistaradeildini í hesum umfarinum. 

HB og B36 spæla grannadyst í Gundadali, har lítið stendur upp á spæl, og í fimta dystinum tekur KÍ ímóti Víkingi.

Allir dystirnir byrja klokkan 15.00 uttan tann ímillum B68 og NSÍ, sum byrjar klokkan 14.00.