EM-lutakast: Kundi næstan ikki verið betri

Føroyska manslandsliðið í hondbólti skal spæla ímóti Slovenia, Montenegro og Sveis í bólkaspælinum til EM, sum verður í Oslo í januar.

Talan er um spennandi lutakast fyri Føroyar, sum mugu metast hava nøkulunda kjans at vinna á øllum trimum mótstøðulondunum.

Slovenia var ynskimótstøðuliðið úr ovasta styrkisbólki, har hinir møguleikarnir vóru Frakland og Ungarn. Úr styrkisbólki 3 fingu vit Montenegro og sluppu undan Póllandi og Hollandi, men Sveis var kanska ikki fyrsta val úr lægsta styrkisbólkinum.

- Hetta var øgiliga nær við at vera tað besta lutakastið, vit kundu fáa, sigur Hjalti Mohr Jacobsen, hjálparvenjari hjá A-landsliðnum.

Hann vísir á, at Føroyar enn ikki hava vunnið ein dyst í einum endaspæli, og at tað helst má vera fyrsta málið, áðrenn tað verður tosað um at koma víðari úr bólkinum. Hinvegin ásannar hann eisini, at við góðu úrslitunum og góðu styrkismetingini koma eisini hægri krøv.

Hoyrið samrøðu við Hjalta Mohr Jacobsen her:

Teir seks bólkarnir til EM-endaspælið eru hesir:

Bólkur A: Týskland, Spania, Eysturríki og Serbia.

Bólkur B: Danmark, Portugal, Norðurmakedonia og Rumenia.

Bólkur C: Frakland, Noreg, Kekkia og Ukraina.

Bólkur D: Slovenia, Føroyar, Montenegro og Sveis.

Bólkur E: Svøríki, Kroatia, Niðurlond og Georgia.

Bólkur F: Ungarn, Ísland, Pólland og Italia.

EM-endaspælið verður í døgunum frá 15. januar til 1. februar 2026 í Noregi, Danmark og Svøríki.

Føroyar spæla sínar dystir í Oslo.