Hákun ein dyst frá Champions League-gullinum

Hákun West av Teigum skrivar hondbóltssøgu, tá hann saman við Füchse Berlin fer á vøllin ímóti Magdeburg í Champions League-finaluni í Köln seinnapartin.

Landsliðsvongurin er fyrstu føroyingurin, sum spælir finalu í størstu evropeisku hondbóltskappingini, men fyri hann og liðfelagarnar er ikki nóg mikið at vera við. Høvuðsstaðarfelagið vil fegið vinna og tryggja sær greipuna.

 - Alt kann henda, um tú ert favorittur ella ikki. Men eg vil eisini siga, at vit koma eitt sindur lættir til kappingina. Um vit høvdu mist meistaraheitið í dag, giti eg ikki, at vit høvdu farið eins sjálvssikkrir. Vit høvdu kanska verið eitt sindur nervøsir, tí vit mugu sum minimum vinna aðra kappingina, men nú fara vit sjálvandi eftir báðum, segði Hákun West av Teigum fyri einari viku síðan eftir at týska meistaraheitið var komið til høldar.

hakun_west_1.jpg

Frítekst tagging: 

Ítróttur

Hondbóltur

Hákun West av Teigum

Champions League

Final 4

Füchse Berlin

Hákun tvey mál í hálvfinaluni

Füchse Berlin tryggjaði sær finaluplássið í gjár. Tað gjørdu teir, tá teir vunnu við 10 málum í hálvfinaluni á franska felagnum Nantes, hóast stórspælarin Mathias Gidsel fekk reytt kort eftir bert átta minuttum. 

Hákun West av Teigum hevði tvey skot í dystinum og skoraði upp á bæði.

Magdeburg vann við einum málið á Barcelona í hinari hálvfinaluni. Champions League-vinnarin í 2023 er væl fyri eftir ein góðan endaspurt í Bundesliguni, sum akkurát ikki rakk til meistaraheitið, men Füchse Berlin hevur yvirtakið í innanhýsis dystum hetta kappingarárið. 

Berlinrevarnir vunnu ein og spældu ein javnan í Bundesliguni og vunnu eisini Super Cup-dystin millum feløgini í august.