Hákun eftir finaluna: Hetta pínir

Hákun West av Teigum dylir ikki fyri, at finalutapið fyri Magdeburg í Champions League-finaluni í gjár helst var størsta vónbrotið higartil á hondbóltsleiðini.

 - Hetta er jú eitt kappingarár, sum varðir í níggju mánaðir, og tú investerar nógv hvønn dag. So at tað endar í einum vónbrotið, tað ger ilt. Tað er pínufult, segði Füchse Berlin-vongurin eftir 32-26 tapið í Lanxess-leikhøllini í Köln.

Føroyingurin spældi ein góðan dyst og skoraði sjey mál upp á níggju royndir - fleiri úr rættiliga spískum, men sum heild gekk striltið hjá høvuðsstaðarfelagnum, sum var aftanfyri mestsum allan dystin og tapti greitt.

Hákun gjørdi sítt 

Mathias Gidsel, spældi ikki sín besta dyst, og fekk ikki stórvegis hjálp frá Lasse Andersson og Nils Lichtlein í bakketuni, meðan Mijajlo Mersenic og Max Darj brendu ferð eftir ferð av strikuni ímóti stórspælandi Sergey Hernandez Ferrer í Magdeburg-málinum. Spanski málverjin bjargaði heili 18 av 42 skotum.

 - Málmaðurin hjá teimum stendur ein fantastiskan dyst, staðfesti Hákun West av Teigum.

 - Vit fáa ikki steðga teirra álopi, og teir koma ov lætt til kjansir beint frammanfyri málinum. Í okkara álopi er flow'ið, sum vit eru kendir fyri, ikki til staðar. Vit fara inn ímóti, men vit sleppa ikki bóltinum, og bólturin kemur ongantíð ordiliga á flog, helt Hákun West av Teigum, ið, sum vera man, ikki vildi siga stórvegis um frálíka avrikið hjá sær sjálvum.

 - Tað er jú bara at koyra á, tá mann fær bóltin. Viðhvørt eydnast tað, og viðhvørt eydnast tað ikki, men eg hevði eina góða kenslu, og tað skal kanska okkurt eyka til á einum so stórum palli. 

hakun_west_1.jpg

Frítekst tagging: 

Ítróttur

Hondbóltur

Hákun West av Teigum

Champions League

Final 4

Füchse Berlin

Hondbóltsmekka

Tað eydnaðist ikki Füchse Berlin at vinna Champions League í fyrstu royndini, og hóast tað kendist sum stórt vónbrot løtuna eftir finaluna, dugir føroyski vongurin kortini at virðismeta stóru Final 4-upplivingina, sum eisini rúmaði flottan hálfinalusigur á Nantes leygardagin.

 - Hetta er jú hondbóltsmekka. Hetta er tað feitasta og tað, sum allir hondbóltsspælarar vilja royna. Hetta var ein risauppliving, og stuttligt at síggja nokkso nógvar føroyingar eisini, segði Hákun West av Teigum, sum er væl nøgdur við sítt fyrsta kappingarár sum fyrsta val á høgra veingi.

 - Tað hevur gingist væl ígjøgnum alt árið. Tað eri eg glaður fyri, og vit eru øgiliga glaðir fyri at vinna týska meistaraheitið, sum eftir mínum tykki er líka ringt at vinna sum Champions League.

Og vera tit aftur í Köln næsta ár?

 - Tað satsa vit upp á. Vit vilja fegnir spæla sovorðnar finalur aftur. Tað er nokkso stuttligt.