Ísraelskt loftálop á Teheran

Ísrael hevur seint fyrrapartin framt eitt loftálop á iranska høvuðsstaðin, Teheran.

Tað sigur ísraelska verjumálaráðið.

Talsmaðurin fyri ísraelska herin, Effie Defrin, sigur, at Ísrael miðvíst loypur á høvuðsborgirnar hjá iransku kollveltingarhirðuni í løtuni.

- Vit eru ikki komnir á mál enn, sigur talsmaðurin.

Defrin vil eisini vera við, at tað er eydnast Ísrael at raka allar herstøðirnar, sum Iran brúkar at skjóta rakettir móti Ísrael.

Iran fær russiskan stuðul

Russlandi er til reiðar at stuðla Iran.

Iranski uttanríkisráðharrin vitjar í Moskva í dag, har hann skal hitta russiska forsetan, Vladimir Putin.

- Og Russland er til reiðar at stuðla iranum, sigur talsmaðurin í Kreml, Dimitrij Peskov.

- Alt er treytað av, hvat Iran heldur vera neyðugt. Vit hava boðið okkum til at mekla. Vit hava gjørt okkara støðu greiða, og tað er ein umráðandi fráboðan, men alt er treytað av, hvat Iran heldur vera neyðugt, sigur talsmaðurin sambært almennu russisku tíðindastovuni Tass. 

Russland fordømir amerikanska álopið á iransku kjarnorkuverkini.