Nógvir finalistar og fleiri nýggj met

Tvey føroysk met vórðu sett, tá innleiðandi kappingarnar í svimjing vóru í Picky-ítróttadeplinum í Kirkwall fyrrapartin.

Bartal E. Eidesgaard tók sítt egna met í 100 metur bringu við tíðini 1.01.85 minuttir og svam seg samstundis í finaluna í kvøld við næstbestu tíð. 

Lea Osberg Højsted setti eisini met í 50 metur bringu. Hon átti sjálv gamla metið, og nýggja besta tíðin er 32.42 sekund. Hon er í finaluni við triðbestu tíð.

Kvinnustafettin nýtt landsliðsmet

Elisabeth Erlendsdóttir, Lea Osberg Højsted, Bjarta í Lágabø og Alisa Vestergaard settu nýtt landsliðsmet í 4x50 metur frí við tíðini 1:46.77 og svumu seg í finaluna við bestu tíð.

Tað gjørdi Isak Brisenfeldt eisini í 200 blandað. Hann svam eisini sína bestu tíð higartil við 2:04.22 - nærum átta sekund skjótari enn gamla tíðin.

Yvirhøvur hava føroyingarnir fingið góða byrjan í Orknoyggjum, og eru í 10 av 11 finalum í kvøld. Svimjingin kann stroymast á síðuni hjá oyggjaleikunum: Orkney2025.com