Dreymurin um eitt sjálvstøðugt Grønland

- At vera ein sjálvstøðug tjóð hevur týdning fyri okkara samleikakenslu.

Tað sigur grønlendska Aka Hansen, sum er aktuel við einari bók um avleiðingarnar av kolonialismu.

Aka Hansen skal leggja bókina Manifest fram á G! Festivalinum fríggjadagin 18. juli, og í samrøðu við útvarpið hjá Kringvarpinum setti hon orð á støðuna.

Bókin snýr seg um avleiðingarnar av kolonialismu, og hon sigur millum annað, at hóast Grønland og Føroyar kunnu sigast at vera lítlar og viðbreknar tjóðir, samanborið við onnur lond, so eigur hetta ikki at spenna bein fyri eini sjálvstøðugari tjóð.

Dreymurin hjá Aka Hansen er í øllum førum, at Grønland gerst ein sjálvstøðug tjóð, sigur hon.

Sambært grønlendska aktivistinum, sum eisini bæði er rithøvundur og filmsskapari, hevur tað at vera ein sjálvstøðug tjóð týdning fyri okkara samleikakenslu. Og hon heldur eisini, at sjálvstýrið hevur týdning fyri ymisk rættindi.

- Sum støðan er í dag kunnu hvørki Føroyar ella Grønland tosa um sín uttanríkispolitikk uttan at Danmark eisini er tilstaðar, sigur Aka Hansen.

Trýst á leinkið niðanfyri og hoyr alla samrøðuna við Aka Hansen, sum var í tíðindunum á nátturða í kvøld.