Hálvrunnir leikir: Kunnu Føroyar fara allan vegin?

Fyri 16 árum síðan tryggjaði ein frálíkur síðsti kappingardagur Føroyum samlaða oyggjaleikasigurin í Álandi við 34 gull-, 23 silvur- og 24 bronsuheiðursmerkjum.

Isle of Man var nummar tvey við 29 gullmedaljum, og Jersey mátti taka til takkar við 3. plássinum við 24 gullum.

Nú gevur góða støðan á medaljutalvuni vón um, at Føroyar kunnu vinna leikirnar á Orknoyggjum og tryggja sær samlaða sigurinfyri 2. ferð í 40 ára gomlu oyggjaleikasøguni.

medaljur_tysdag_1.png

Sum yvirlitið vísir, hava Føroyar vunnið heili 21 gull higartil umframt 13 silvur og 7 bronsur.

Fimleikur,sum endiliga er við aftur sum oyggjaleikagrein, hevur tryggjað Føroyum heili níggju 1. pláss. Bogaskjóting hevði ein gyltan mánadag og hevur tilsamans vunnið seks kappingar, meðan svimjing (4) og frælsur ítróttur (2) eisini hava staðið ovast á sigursskamlinum fleiri ferðir.

Sí eisini: Samlaða føroyska úrslitayvirlitið

Spurningurin er nu, hvussu fer at hilnast næstu dagarnar. Hóast einki kann sigast við vissu, eru gullvónirnar hjá fimleiki og svimjing góðar hvønn kappingardag. Í fimleiki eru serliga nógv heiðursmerki at vinna fríggjadagin, tá einstaklingakappingarnar vera. Har hevur eitt nú Mia Højgaard góð kort á hondini.

Harumframt eru góðir møguleikar í bæði bogaskjóting, badminton og frælsum ítrótti.

Eitt sindur verri er at spáa um, hvussu tað fer at hilnast hjá hinum oyggjunum. Jersey stendur seg eisini væl í svimjing, men pistólsskjótingin,sum vanliga hevur givið kanaloynni nógvar medaljur, er ikki við hesa ferð.