Starvsfelagið tekur undir við at samráðast í krónum

Lønarsamráðingar verða í heyst, og samráðingarleisturin skal broytast, sigur landsstýrið

Semingsstovnurin var uppií, tá Starvsfelagið gjørdi sáttmála í heyst. Her taka Súni Selfoss, formaður, og Terje Sigurðsson, semingsmaður, í hondina á hvørjum øðrum, tá semja var fingin um nýggja sáttmálan.

Mynd: Bjarni Árting Rubeksen

Annika Bolton Mortensen

31.07.2025 - 11:19

Lønarsamráðingarleisturin skal broytast í heyst, og útgangsstøðið hjá landssýrinum er, at lønarsamráðingarnar verða í krónum heldur enn í prosentum.

Tað segði Aksel V. Johannesen í løgmansrøðuni á ólavsøku.

Starvsfelagið tekur undir við lønarsamráðingum í krónum, meðan Akademikarafelagið er heldur stúrið um ætlaðu broytingarnar.

Súni Selfoss, formaður í Starvfelagnum, vísir á, at Starvsfelagið hevur gjørt lønarsáttmálar, sum bæði eru í krónum og prosentum.

Tá lønarhækking verður latin í prosentum, fáa tey, sum tjena mest, størstan lønarvøkstur.

Um vit hyggja at hægsta lønarstigi hjá t.d. heilsuhjálparum og hægsta stigi hjá teimum við masterútbúgvingum, sæst vaksandi lønargjógvin tyðiliga.

Fáa báðir bólkar fimm prosent í lønarvøkstri, fær heilsuhjálparin útgoldið 1600 kr. meira um mánaðin, meðan tann við masterútbúgving fær góðar 2600 krónur meir um mánaðin.

Hoyr innslag í útvarpstíðindunum:

31072025_Lonarsamradingar

Í Heilsuhjálparafelag Føroya fegnast tey um ætlanina at broyta samráðingarleistin. Tað fer at skapa eitt rættvísari og javnari samfelag, sigur forkvinnan, Mary Antonsdóttir.