Tætt knýtt bond millum Globe Tracker og LÍV

Bondini millum fyritøkuna Globe Tracker og eftirlønarfelagið LÍV knýtast alsamt tættari.

Árni Ellefsen fór beint úr starvinum sum nevndarformaður í Globe Tracker til at gerast nevndarformaður í LÍV-samtakinum. 

Tað var í fjørsummar, at Árni Ellefsen tók við sum nevndarformaður í kreppuraktu fyritøkuni Globe Tracker, sum ár eftir ár hevur stríðst við risastór undirskot.

Við ársenda í fjør var støðan í felagnum so mikið vánalig, at eigararnir avgjørdu at niðurskriva allan kapitalin í felagnum til null.

Talan var um 234 milliónir krónur, sum blivu avskrivaðar.

Niðurskrivingin varð framd 30. desember í fjør.

Bóðu um nýggjan partapening

Í tí sambandi fingu verandi partaeigarar - hvørs virði í Globe Tracker varð virðisleyst - tilboð um at seta nýggjan partapening í felagið.

Ein av partaeigarunum, Norðoya Íløgufelag - eitt felag undir almenna Føroyagrunninum við heimstaði í Klaksvík - valdi tá at takka fyri seg.

Tað váttaði Eyðfinn Olsen, stjóri í íløgufelagnum, fyri útvarpinum í gjárkvøldið.

Sí: Sleikja sárini eftir miseydnaða íløgu í Globe Tracker

Tryggingarfelagið Lív

Nýggja høvuðssætið hjá eftirlønarfelagnum LÍV á Óðinshædd í Havn. 

Tveir partaeigarar eftir

Eftir vóru nú bara tveir partaeigarar - reiðaríið Framherji í Fuglafirði og eftirlønarfelagið LÍV, sum átti í Globe Tracker gjøgum feløgini "P/F Tryggingarfelagið LÍV" og "P/F LÍV lívs- og pensjónstryggingarfelag."

Hesi báðir partaeigarar - reiðaríið í Fuglafirði og LÍV-samtakið - settu nú 66,7 milliónir krónur í Globe Tracker ApS.  

Sambært donsku vinnuskránni er hjá báðum pørtum talan um lán, sum vórðu umløgd til partapening.

Framherji eigur nú beint oman fyri 50 prosent, og tey bæði feløgini í LÍV-samtakinum beint undir 50 prosent.

Nevndarformaður í Globe Tracker um hetta mundið er Árni Ellefsen, fyrrverandi stjóri í Føroya Banka.

Hann bleiv sum nevnt nevndarformaður í Globe Tracker í fjørsummar, tá hann tók við formanssessinum eftir Jan Jakobsen - sum annars eisini er stjóri í LÍV-samtakinum.

Verður formaður í LÍV

Nevndarformaður í Tryggingarfelagnum LÍV um hetta mundið er Høgni Olsen.

Undan aðalfundinum í LÍV-samtakinum síðst í apríl, boðar Høgni Olsen frá, at hann tekur seg úr nevndini í LÍV, tí hann er blivin fíggjarstjóri hjá Atlantsflog.

Nú stendur nevndarformanssessurin í risastóra eftirlønarfelagnum tómur.

Aðalfundurin velur Árna Ellefsen til nýggjan nevndarformann.

Árni Ellefsen - sum fáar mánaðir frammanundan hevur sitið hinumegin borðið, umboðandi Globe Tracker - fer nú at sita við borðendan í LÍV-samtakinum.

- Tá eg bleiv valdur til nevndarformann í LÍV, valdi eg at siga nevndarfomanssessin í Globe Tracker frá mær. Tað var ikki samsvar millum at sita í LÍV-nevndini og í Globe Tracker samstundis, sigur Árni Ellefsen.

Ongar viðmerkingar

Árni Ellefsen - fyrrverandi nevndarformaður í Globe Tracker og núverandi nevndarformaður í LÍV-samtakinum - hevur ongar viðmerkingar, tá vit spyrja hann, hví Globe Tracker framvegis var ein góð íløga hjá LÍV, eftir at allur kapitalurin í felagnum varð niðurskrivaður og harvið mistur. 

Hann vil heldur ikki upplýsa, hvussu nógvar pengar LÍV-samtakið tilsamans hevur sett í Globe Tracker, sum blivu niðurskrivaðar til null á nýggjárinum.

Tað einasta, sum ber til at staðfesta í løtuni, er at góðar 30 milliónir krónur, sum LÍV einaferð í tíðini hevur lænt Globe Tracker, á nýggjárinum vórðu umlagdar til nýggjan partapening í felagnum.

Nýggjur nevndarformaður í Globe Tracker eftir Árna Ellefsen er Hjalti Hvítklett.