Reyði krossur fingið samarittbil

Í summar hava samarittarnir í Reyða krossi sum vanligt verið við til nógv ymisk tiltøk. 

Tó hevur hetta summarið verið øðrvísi hjá teimum, sum eru sjálvbodnir samarittar, tí síðani juni mánað hava umstøðurnar verið munandi øðrvísi enn undanfarin ár.

Samarittarnir hava fingið ein fyrrverandi sjúkrabil í Danmark til Føroya.

- Tá vit fara til stór tiltøk kring landið, koyra vit við hesum bilinum og hava alla hugsandi útgerð við okkum. Vit fingu hann tíðliga í summar, og hann hevur roynst sera væl, sigur Pætur Fredriksen, sum er samarittur í Reyða krossi.

Eisini Rógvi Dam, sum heur fleiri ár á baki sum samarittur, letur væl at bilinum.

- Fyrr høvdu vit ein gamlan vøruvogn, og hvørja ferð vit skuldu út til eitt tiltak, máttu vit brúka drúgva tíð upp á at pakka bilin og gera hann kláran, so bara tann parturin er munandi lættari nú, tí við hesum bilinum hava vit allar nútímans hentleikar í bilinum, og hann er altíð klárur at brúka, sigur Rógvi Dam og leggur afturat, at serliga børan, ið er í bilinum, er kærkomin.

- Vit hava annars brúkt gamlar børur, og tað hevur ikki altíð verið líka lætt. Harafturat er tað eisini øgiliga gott at kunna fara inn í bilin við teimum, sum hava tørv á okkara hjálp, og kunna hjálpa teimum í friði og náðum, sigur Rógvi Dam.

Samarittbilurin, sum er av merkinum Volkswagen, kom til landið í juni og hevur hetta summarið verið við á eitt nú Tórsfest og á Ovastevnu.