U21-landsliðið: Vistu at møguleikar komu

Við málum frá Mattiasi Hellisdal og Áka Samuelsen vann føroyska U21 landsliðið hóskvøldið 2-1 á útivølli móti Íslandi. 

Tað vóru bara farnir tríggir minuttir, so legði Mattias Hellisdal Føroyar á odda 1-0, og tá eitt stórt korter var spælt økti Áki Samuelsen um føroysku leiðsluna.

Íslendska trýstið vaks sum frá leið, men heimaliðið fekk bara tað eina málið, og so var frálíki sigurin veruleiki. 

 - Vit vistu frammanundan, at vit komu at verja nokkso stóran part av dystinum og ofta langt afturi á egnari hálvu, segði venjarin Ólavur Mikkelsen. 

 - Vit fingu teir at hava bóltin, har vit vildu, og so arbeiddu vit knallhart og kláraðu at standa ímóti, so teir ikki fingu teir heilt stóru kjansirnar. Og so vistu vit, at vit kundu fáa møguleikar við mótálopum.

Tú mást spæla tín kjans

Týsdagin spælir U21-landsliðið aftur, tá Luksemborg tekur ímóti. Talan er um eitt roynt lið, sum er sterkt tekniskt. Harumframt er merkisvert, at spælararnir upprunaliga eru frá fleiri øðrum tjóðum.

Føroyska liðið ferðast til Luksemborg í dag, og tríggjar venjingar eru á skránni áðrenn dystin. Ólavur Mikkelsen segði við útvarpið hjá Kringvarpinum, at ongar stórvegis broytingar verða gjørdar, men kanska onkur lítil rætting.

 - Vit hava góðar vónir. Vit vita sjálvandi, at mótstøðan er sterk - tað er hon hvørja ferð - men tú mást spæla tín kjans, og vit eru altíð optimistiskir um at fáa stig, sigur landsliðsvenjarin.

Føroyar hava fingið frálíka byrjan upp á EM-undankappingina. Eftir dystirnar ímóti Estlandi og Íslandi, hevur føroyska U21-landsliðið seks stig.