Koyrdi 143 kilometrar um tíman

Ein ungur bilførari misti koyrikortið á staðnum í gjár uttanfyri Kaldbakstunnilin, Kaldbaksmegin. Viðkomandi koyrdi 143 kilometrar um tíman, og tað er nógmikið at taka koyrikortið á staðnum. Bilførarin er eisini skuldsettur fyri at hava yvirhálað tvørtur um sperrilinju á vegnum.

Hinumegin tunnilsmunnan, í Kollfjarðadali, varð ein annar bilførari eisini tikin fyri at koyra ov skjótt. Hann koyrdi 116 kilometrar um tíman og fekk treytaða frádøming.

Og á Nesi fór ein bilur við fimm ungfólkum út av vegnum klokkan 1 nátt. Talan var tó ikki um nakað álvarsligt bilóhapp.

Og so sigur løgreglan, at tey hava klipt plátur í Klaksvíkar kommunu í nátt. Seks bilar mistu pláturnar, so tað ræður um at hyggja eftir, um bilurin hevur nummarplátu, áðrenn farið verður avstað í morgun.